බලංගොඩ නාය යෑමෙන් එකම පවුලේ 4ක් අතුරුදන් : අතුරුදන්වූවන් සොයා මෙහෙයුම් ඇරඹේ

බලංගොඩ, ගවරංහේන, වැහිංතැන්න ප්‍රදේශයේ නාය යෑමෙන් එකම පවුලේ මව, පියා සහ දියණියන් දෙදෙනා අතුරුදන්ව තිබේ.

රත්නපුර දිස්ත්‍රික් ලේකම් වසන්ත ගුණරත්න මහතා පැවසුවේ, අද (13) පෙරවරුවේ ඔවුන් සොයා මෙහෙයුම් ආරම්භ කර ඇති බවයි.

මේ අතර, ගාල්ල එලියට් පාර ප්‍රදේශයේ පස් කණ්ඩියක් කඩා වැටීමෙන් ඊයේ (12) නිවසකට අර්ධ හානි සිදුව ඇතැයි ආපදා කළමනාකරණ මධ්‍යස්ථානය සඳහන් කළේ ය.

මේ අතර අධික වර්ෂාවත් සමග දිස්ත්‍රික්ක 9ක් සඳහා නායයාමේ අනතුරු ඇඟවීම් නිකුත් කර තිබේ.

ජාතික ගොඩනැගිලි පර්යේෂණ සංවිධානය නිවේදනය කළේ, බදුල්ල, කෑගල්ල, රත්නපුර, කොළඹ, හම්බන්තොට, මහනුවර, කුරුණෑගල, මාතර සහ කළුතර දිස්ත්‍රික්ක සඳහා නිකුත් කළ නායයෑම් පිළිබඳ අනතුරු ඇඟවීම තවදුරටත් ක්‍රියාත්මක බවයි.

මේ අතර අදත් ප්‍රදේශ රැසකට මිලිමීටර් 100 ඉක්ම වූ වැසි අපේක්ෂා කරන බව කාලගුණ විද්‍යා දෙපාර්තමේන්තුවේ කාර්යභාර කාලගුණ විද්‍යාඥ මලිත් ප්‍රනාන්දු මහතා පැවසීය.

You May also like

Leave a Reply

Your email address will not be published. Required fields are marked *