ඇෆ්ගනිස්තානයේ උප ජනාධිපති ඉලක්ක කර බෝම්බ ප්‍රහාරයක් – හයදෙනකු ජීවිතක්ෂයට

ඇෆ්ගනිස්තානයේ උප ජනාධිපති අම්රුල්ලා සලේ මහතා ඉලක්ක කරගනිමින් අද (09) පෙරවරුවේ බෝම්බ ප්‍රහාරයක් එල්ල විය.

එම ප්‍රහාරයෙන් දිවි බේරාගැනීමට උප ජනාධිපතිවරයා සමත්ව ඇති අතර හයදෙනකු ජීවිතක්ෂයට පත්ව ඇතැයි වාර්තා වේ.

ඇෆ්ගනිස්තානයේ උප ජනාධිපතිවරුන් කිහිපදෙනකු සිටින අතර ඉන් පළමුවැන්නා අම්රුල්ලා සලේ ය. ඔහුගේ රථ පෙළ ඉලක්ක කරගනිමින් මෙම බෝම්බ ප්‍රහාරය එල්ල වී ඇතැයි ද එම ප්‍රහාරයෙන් උප ජනාධිපතිවරයාට කිසිදු හානියක් සිදුව නැතැයි ද, උප ජනාධිපතිවරයාගේ ප්‍රකාශකවරයා පැවැසීය.

මෙම ප්‍රහාරයට තමන්ගේ කිසිදු සම්බන්ධයෙන් නැතැයි තලේබාන් සංවිධානය මේ වනවිටත් ප්‍රකාශ කර ඇත.

මෙම ප්‍රහාරය එල්ල වූයේ ඇෆ්ගන් රජය සහ තලේබාන් සංවිධානය අතර කටාර් රාජ්‍යයේ දෝහා අගනුවරදී සාම සාකච්ඡා ආරම්භ කිරීමට සූදානම් වෙමින් තිබෙන මොහොතක ය. විවිධ හේතු මත ඇෆ්ගන් සාම සාකච්ඡා මාස කිහිපයක් තිස්සේ ප්‍රමාද විය.

“අද, තවත් වරක් ඇෆ්ගනිස්තානයේ සතුරන් සාලේහ් ට අනතුරක් කරන්න උත්සාහ කළා. එහෙත් යක්ෂයාගේ හස්තය අසමත් වුණා. ප්‍රහාරයෙන් සාලේහ් ට කිසිදු අනතුරක් නැහැ” උප ජනාධිපතිවරයාගේ කාර්යාලය වෙනුවෙන් ෆේස්බුක් සමාජ ජාලය ඔස්සේ සටහනක් තබමින් උප ජනාධිපතිවරයාගේ ප්‍රකාශක රස්වාන් මුරාද් සඳහන් කළේය.

බෝම්බ ප්‍රහාරයෙන් උප ජනාධිපතිවරයාගේ ආරක්ෂකයන් කිහිපදෙනකු තුවාල ලබා ඇති අතර රථ කිහිපයකට හානි සිදුව තිබේ.

ප්‍රහාරයෙන් ටික වේලාවකට පසු සමාජ මාධ්‍ය ඔස්සේ පෙනී සිටි උප ජනාධිපතිවරයා, ප්‍රහාරයෙන් තම මුහුණට ඉතා කුඩා පිළිස්සුම් තුවාලයක් සිදු වූ බවත් අතකට ද තුවාල වූ බවත් කීවේය.

මෙම ප්‍රහාරයට තම සංවිධානයේ හෝ තම සටන්කාමීන්ගේ සම්බන්ධයක් නැතැයි ට්විටර් පණිවුඩයක් නිකුත් කරමින් තලේබාන් සංවිධානයේ ප්‍රකාශක සබිහුල්ලා මුජහිද් පැවැසීය.

You May also like

Leave a Reply

Your email address will not be published. Required fields are marked *