ජනාධිපති මෛත්‍රීපාල සිරිසේන මහතා සිරකරුවන් 13 දෙනකුට මරණ දඬුවම ක්‍රියාත්මක කිරීමට සූදානම් බව වාර්තා වී ඇති බවත් එමගින් මානව හිමිකම් සම්බන්ධයෙන් ශ්‍රී ලංකාව මෙතෙක් පවත්වාගෙන පැමිණි කීර්තිනාමය දැඩි ලෙස පළුදු වනු ඇති බවත් ප්‍රජාතන්ත්‍රවාදය සඳහා නීතිඥයන්ගේ සංගමය නිවේදනයක් නිකුත් කරමින් සඳහන් කරයි.
මරණ දඬුවම ක්‍රියාත්මක නොකරමින් ශ්‍රී ලංකාව වසර 43ක් මුළුල්ලේ දකුණු ආසියානු කලාපයේ මානව හිමිකම් ආරක්ෂා කිරීමට ප්‍රමුඛත්වය දෙමින් ජාත්‍යන්තර බැඳීම්වලට අනුකූලව යමින් ජාත්‍යන්තරයේ විශ්වාසය දිනාගත් බව ද එම නිවේදනයේ සඳහන් වේ.
මරණ දඬුවම පැනවීමෙන් මත්ද්‍රව්‍ය උවදුර සාර්ථකව තුරන් කළ බවට කිසිදු ප්‍රත්‍යක්ෂ සාධකයක් නැති බවත් විවිධ අධ්‍යයනවලින් ද ඒ බව තහවුරු වී ඇතැයි එහි සඳහන්ව ඇත.
එක්සත් ජාතීන්ගේ මහ මණ්ඩල සැසිවාරවලදී ශ්‍රී ලංකා රජය මරණදඬුවම ක්‍රියාත්මක නොකිරීමට පක්ෂව දිගින් දිගටම ඡන්දය ප්‍රකාශ කළ අතර ජනාධිපති මෛත්‍රීපාල සිරිසේන මහතා මරණදඬුවම ක්‍රියාත්මක කළහොත් එය ශ්‍රී ලංකාව මෙතෙක් පවත්වාගෙන පැමිණි ප්‍රතිපත්තිය කඩ කිරීමක් යැයි ද එම නිවේදනයේ සඳහන් වේ.
ශ්‍රී ලංකාවේ අපරාධ අධිකරණ පද්ධතිය විමසා බැලීම, අදාළ ප්‍රතිසංස්කරණ සිදුකිරීම, නීතිය දැඩිව ක්‍රියාත්මක කිරීම, මත්ද්‍රව්‍යවලට ගොදුරු වන පුද්ගලයන් පුනරුත්ථාපනය කිරීම, මත්ද්‍රව්‍ය ජාවාරමේ අක්මුල් සොයා ඒවා විනාශ කිරීම යනාදිය මත්ද්‍රව්‍ය උවදුර මැඬලීමේ වඩාත් ළුලදායී ක්‍රියාමාර්ග යැයි ද ප්‍රජාතන්ත්‍රවාදය සඳහා නීතිඥයන්ගේ සංගමය නිකුත් කළ එම නිවේදනයේ දැක්වේ.
මත්ද්‍රව්‍ය උවදුර මැඬලීම සඳහා දීර්ඝකාලීන විසඳුම් අවශ්‍ය බවත් ජනප්‍රියත්වය වෙනුවෙන් ජනප්‍රිය තීන්දු තීරණ නොගෙන සිටින ලෙස ජනාධිපතිවරයාගෙන් ඉල්ලා සිටින බවත් එම නිවේදනයේ වැඩිදුරටත් සඳහන් වේ.
