මධුෂ් සහ අමල් එනතුරු පොලිසිය කටුනායක බලා සිටී – ඇල්ලූ පිරිසේ අපරාධ ලැයිස්තුවක් !

මාකඳුරේ මධුෂ් සහ අමල් පෙරේරා ඇතුළු පිරිසද ඩුබායි සිට පිටුවහල් කරනු ඇති බවට පොලිසිය විශ්වාස කරනවා.

ඒඅනුව ඔවුන් පැමිණේද යන්න පිළිබඳව විමසිල්ලෙන් සිටින බවයි පොලිසිය සඳහන් කළේ.

කංජිපානි ඉම්රාන් ඇතුළු පාතාල සාමාජිකයන් සිවු දෙනා ගුවන්තොටුපළට පැමිණ පසුව මාලදිවයින බලා පලා යෑමට උත්සාහ කර ඇත්තේ ඔවුන් ඩුබායි රාජ්‍යයෙන් පිටුවහල් කළ බවට අදාළ ක‍්‍රමවේදයන් කිසිවක් අනුගමනය කර නොතිබූ නිසා බව ගුවන් තොටුපළ ආරංචි මාර්ග පවසනවා.

කිසියම් පුද්ගලයකු රටින් පිටුවහල් කරන්නේ නම් ඊට අදාළ ලිපි ලේඛන ඇතුළු වාර්තාවක් පිටුවහල් කරන්නා ගමන් ගන්නා ගුවන් යානයේ නියමුවා මගින් එරට ආගමන විගමන නිලධාරීන් වෙත යොමු කරනු ලබයි.

නදීමාල් පෙරේරා සහ ලලිත් කුමාර ශී‍්‍ර ලංකාවට පැමිණි අවස්ථාවේ එම ක‍්‍රමවේදය අනුගමනය කර තිබූ අතර ඔවුන් දෙදෙනා පහසුවෙන් අත්අඩංගුවට ගැනීමට හැකි වුණා.

එහෙත් කංජිපානි ඉම්රාන් ඇතුළු පාතාල සාමාජිකයන් සිවුදෙනා මෙරටට එවීමේදී එරටින් පිටුවහල් කිරීමට අදාළ ක‍්‍රමවේදයන් කිසිවක් ඩුබායි රජය අනුගමනය කර නොතිබූ නිසා ඔවුන්ට රටින් පලා යෑමට අවස්ථාව සැලසී තිබුණා.

මාකඳුරේ මධුෂ් ඩුබායි දේශයෙන් පිටුවහල් කරන අවස්ථාවේ මෙවැනි ක‍්‍රමවේදයක් ඩුබායි පොලිසිය අනුගමනය කළහොත් ඔහුට ලෙහෙසියෙන්ම රටින් පලා යෑමට ඉඩකඩ තිබෙන බව ආගමන විගමන නිලධාරීහු පවසනවා.

මේ සම්බන්ධයෙන් ආරක්ෂක අංශ ප‍්‍රධානීන්ගේ ප‍්‍රධානත්වයෙන් විශේෂ සාකච්ඡුාවක් ඊයේ (28 )සවස පැවැත්වූණා.

කංජිපානී ඉම්රාන් සහ අමිල සම්පත් යන අය කටුනායක ගුවන් තොටුපලට පැමිණීමෙන් පසු  පලායාමට සූදානමින් සිටියදී යානයේ මගීන්ගේ නම් ලැයිස්තුව පරීක්‍ෂා කර අත්අඩංගුවට ගැනීමට ගුවන් තොටුපල රහස් පොලිස් ඒකකය කටයුතු කර තිබෙනවා.

පොලිස් මාධ්‍ය ප‍්‍රකාශක රුවන් ගුණසේකර මහතා ඊයේ (28) පැවති මාධ්‍ය හමුවක් අමතමින් කළ සම්පුර්ණ ප්‍රකාශය පහතින් දැක්වෙනවා.

මෙලෙස අත්අඩංගුවට පත්වූවන් අතුරින් මොහොමඞ් නජීබ් මොහොමඞ් ඉම්රාන් හෙවත් කංජිපානි ඉම්රාන් නැමති අය කොළඹ 08, ශ්‍රී සුධර්ම මාවත, අංක 99/8 ලිපිනයේ පදිංචිකරුවකු වන අතර ඔහු ඩුබායි බලා පිටව ගොස් ඇත්තේ 2015 මාර්තු 28 වැනිදා ව්‍යාජ ගමන් බලපත‍්‍රයකින් බව ද පොලිස් මාධ්‍ය ප‍්‍රකාශකවරයා සඳහන් කළේය.

ඔහු 2016 ජනවාරි මස 26 වැනිදා එරට නේවාසික වීසා ලබාගෙන ඇති අතර එහි ජංගම දුරකථන ව්‍යාපාරිකයෙකු ලෙස සේවය කර ඇති බව ප‍්‍රශ්න කිරීම්වලදී ප‍්‍රකාශ කර ඇතැයි ද පොලිස් මාධ්‍ය ප‍්‍රකාශකවරයා පැවසීය.

ඩුබායිහි සැඟවී සිටිමින් මත්ද්‍රව්‍ය ජාවාරම, කප්පම් ගැනීම්, මිනී මැරුම් ඇතුළු සංවිධානාත්මක අපරාධ ගණනාවක් ඔහු විසින් මෙහෙයවා ඇති අතර ඒ හේතුවෙන් ඔහු පොලිසිය විසින් අත්අඩංගුවට ගැනීමට සොයමින් සිටි අපරාධකරුවකු බව ද රුවන් ගුණසේකර මහතා කීවේය.

පසුගිය කාලයේ කොළඹ නගරයේ සිදුවූ වෙඩි තැබීම් ගණනාවකට ඔහු සම්බන්ධ බව කී පොලිස් මාධ්‍ය ප‍්‍රකාශකවරයා සිය අනියම් බිරිඳ වූ ආශා ෆාරික් ඉකුත් පෙබරවාරි 14 වැනිදින කොටහේන මෛත‍්‍රී බෝධිරාජ මාවතේදී වෙඩි තබා ඝාතනය කිරීමේ සිද්ධියද ඩුබායි සිට මෙහෙයවා ඇත්තේ ඔහු විසින්ම බවට හෙළි වී ඇතැයි කියා සිටියේය.

බොරැල්ල කොටාපාරේදී 2018 පෙබරවාරි 20 වැනිදා ප‍්‍රසාද් කුමාර නොහොත් අසිත යන අය වෙඩි තබා ඝාතනයට තැත්කිරීම, මාළිගාවත්ත, අලාම් ඉක්බාල් මාවතේදී 2018 මාර්තු 27 වැනිදා තාවුල් හමීඞ් මොහොමඞ් නිප‍්‍රාස් නැමැත්තා වෙඩි තබා ඝාතනය කිරීම, කොටහේන, ආමර් වීදිය, මැසෙන්ජර් මාවතේදී 2018 මාර්තු 19 වැනි දින ඇන්ටනී රාජ් නැමැත්තා වෙඩි තබා ඝාතනය කර තවත් කාන්තාවකට තුවාල සිදුකිරීම, වෙරළබඩ, ජම්පටාර් වීදියේදී 2018 පූලි 8 වැනිදා සෙල්ලයියා සෙල්වරාජ් සහ එළිසබෙත් පෙරේරා යන දෙදෙනා වෙඩි තබා ඝාතනය, මාළිගාවත්ත ජුම්මා හන්දියේදී 2018 අගෝස්තු 30 වැනිදා මොහොමඞ් හමීඞ් අබ්දුල් රවුෆ් නැමැත්තා වෙඩි තබා ඝාතනයට තැත් කිරීම, එම වසරේම සැප්තැම්බර් 12 වැනිදා මාළිගාවත්ත ලක්සෙත මහල් නිවාස අසලදී අජ්මීර් නැමැත්තෙකු වෙඩි තබා ඝාතනයට තැත් කිරීම, ඔක්තෝබර් 20 වැනිදා මාළිගාවත්ත ජුම්මා මස්ජීඞ් පාරේදී මොහොමඞ් නිශාම්ඞීන් මොහොමඞ් අජ්මීන් නැමැත්තා වෙඩි තබා ඝාතනයට උත්සාහ කිරීම, නොවැම්බර් 7 වැනිදා ග‍්‍රෑන්ඞ්පාස් පරාක‍්‍රම පාරේදී එම්තඒ නිප‍්‍රාස් නැමැත්තා වෙඩි තබා ඝාතනයට තැත් කිරීම, දෙසැම්බර් 10 වැනිදා මෝදරදී පුද්ගලයින් පිරිසකට වෙඩි තබා 6 දෙනෙකුට තුවාල සිදුකර ඝාතනයට තැත් කිරීම, 2019 ජනවාරි 1 වැනිදා වෙරළබඩ ජම්පටාර් වීදියේදී කන්දන ආරච්චිගේ මැල්කම් පෙරේරා වෙඩි තබා ඝාතනයට තැත් කිරීම, ජනවාරි 20 වැනිදා ජින්තුපිටිය ප‍්‍රදේශයේදී ඇන්ටන් මයිකල් යන අය වෙඩි තබා ඝාතනයට තැත් කිරීම යන අපරාධ ගණනාවකට මොහු ඩුබායිහි සැ`ගවී සිටිමින් මෙහෙයවූ බවට විමර්ශනවලදී අනාවරණය වී ඇතැයි රුවන් ගුණසේකර මහතා කීවේය.

ඔහුට එරෙහිව විෂ මත්ද්‍රව්‍ය චෝදනා සම්බන්ධයෙන් නඩු කිහිපයකටම අධිකරණ මගින් වරෙන්තු නිකුත් කර තිබෙන බව පොලිස් මාධ්‍ය ප‍්‍රකාශකවරයා පැවසීය.

තුඹේදුර හේවා අනුෂ්ක කෞෂාල් හෙවත් ජංගා නැමැත්තා ගන්දර, තලල්ල දකුණ, වෙලේගෙදර ප‍්‍රදේශයේ පදිංචිකරුවකු වන අතර ඔහු ඩුබායි බලා පිටත්ව ගොස් ඇත්තේ 2019 පෙබරවාරි මස 03 වැනිදා වුවත් 2017 වසරේ නොවැම්බර් මාසයේ එරට නේවාසික වීසා ලබාගෙන තිබීමෙන් වරින් වර එහි ගොස් ඇති බව පෙනීයන්නේ යයි පොලිස් අධිකාරීවරයා සඳහන් කළේය.

ඔහු මාතර, ගන්දර, තලල්ල ප‍්‍රදේශයේ අවන්හලක හිමිකරුවකු වන අතර පසුගිය පෙබරවාරි 8 වැනිදා ගන්දර පොලීසියේ නිලධාරීන් පිරිසක් විසින් ඔහුගේ නිවස පරීක්‍ෂා කිරීමේදී එහි තිබී යුද හමුදා ඇඳුම් කට්ටල, ටී 56 පතරොම්, පුහුණුවීම් සඳහා භාවිතා කරන පතරොම්, යතුරු පැදි දෙකක් සහ කිණිස්සක් සොයාගත් බව ද හෙතෙම කීවේය.

මේ සම්බන්ධයෙන් එම නිවසේ සිටි ඔහුගේ ඥාති සොහොයුරෙකු සහ පියාගේ සොහොයුරෙකු අත්අඩංගුවට ගෙන අප්‍රේල් 2 වැනිදා දක්වා රක්‍ෂිත බන්ධනාගාර ගත කර සිටින බව ද පොලිස් මාධ්‍ය ප‍්‍රකාශකවරයා පැවසීය.

ඒ සම්බන්ධයෙන් ජංගා නැමති මොහුද පොලීසියට අවශ්‍යව සිටි අයෙකු බව ඔහු සඳහන් කළේය.

අමිල සම්පත් නැමැත්තා රොටුඹ, දෙල්කඳලිය ප‍්‍රදේශයේ පදිංචිකරුවකු වන අතර, 2017 වසරේ අගෝස්තු මස 7 වැනිදා ඩුබායි බලා ගොස් ඇති අතර ඔහු 2017 ඔක්තෝබර් මස 11 වැනිදා එරට නේවාසික වීසා ලබාගනිමින් එහි ඉන්ධන පිරවුම්හලක සේවය කර ඇත.

ඔහුද 2005 අගෝස්තු 27 වැනිදා ඌරුබොක්ක පොලිස් වසමේදී වෙඩි තබා පුද්ගලයෙකු ඝාතනය කිරීමේ චෝදනාව මත අත්අඩංගුවට ගැනීමට සොයමින් සිටි අයෙකු බව පොලිස් මාධ්‍ය ප‍්‍රකාශකවරයා පැවසීය.

ඇන්ඩර්සන් ෆර්නැන්ඩස් නැමැත්තා කොළඹ 13, මහා විද්‍යාල මාවතේ පදිංචිව සිටි අයෙකු වන අතර ඔහු ඩුබායි ගොස් ඇත්තේ 2019 ජනවාරි 30 වැනිදා වන අතර එහි වාහන කොටස් අලෙවි කරන්නෙකු ලෙස සේවය කර ඇත.

මෙම අත්අඩංගුවට ගත් සිව්දෙනා අතරින් කංජිපානී ඉම්රාන් වැඩිදුර විමර්ශන සඳහා කොළඹ අපරාධ විමර්ශන කොට්ඨාසයට භාරදීමට නියමිත අතර අනුෂ්ක කෞෂාල් හෙවත් ජංගා නැමැත්තා සහ අමිල සම්පත් නැමැත්තා මාතර පොලිස් කොට්ඨාශයට භාරදීමට නියමිත බව ද පොලිස් මාධ්‍ය ප‍්‍රකාශකවරයා කීවේය.

ඔවුන් සම්බන්ධයෙන් නඩු පවතින්නේ මාතර දිස්ත‍්‍රික්කයේ පොලීසි හා අධිකරණ ආශ‍්‍රිතව බැවින් ඔවුන් සම්බන්ධයෙන් ඉදිරි පියවර ගැනීමට කණ්ඩායමක් එවන ලෙස මේ වන විට මාතර කොට්ඨාශ භාර නිලධාරීන්ට දැනුම් දී තිබෙන බව ද රුවන් ගුණසේකර මහතා පැවසීය.

ඇන්ඩර්සන් ෆර්නැන්ඩස් නැමැත්තා තව දුරටත් රහස් පොලීසියේ කටුනායක ඒකකයේ රඳවා තබාගෙන ප‍්‍රශ්න කිරීමට නියමිත බවද පොලිස් අධිකාරීවරයා ප‍්‍රකාශ කළේය.

මේ අතර ඩුබායි සිට පිටුවහල් කිරීමෙන් අනතුරුව පෙරේදා දිනයේ ලංකාවට පැමිණි අවස්ථාවේ අත්අඩංගුවට ගත් බන්ධනාගාර නිලධාරියෙකු වන ලලිත් කුමාර නැමැත්තා කොළඹ අපරාධ කොට්ඨාශයේ නිලධාරීන් විසින් කළුතර මහේස්ත‍්‍රාත් අධිකරණය වෙත ඉදිරිපත් කර පැය 48ක රැඳවුම් නියෝග යටතේ ප‍්‍රශ්න කිරීම සඳහා අවසර ලබාගැනීමට නියමිතව තිබූ බව ද ඔහු කීවේය.

ලලිත් කුමාර නැමති මෙම බන්ධනාගාර නිලධාරියා කළුතර උතුර, එතනමඩල ප‍්‍රදේශයේ දී බන්ධනාගාර බස් රථයකට වෙඩි තබා රැඳවියන් 5 දෙනෙකු සහ බන්ධනාගාර නිලධාරීන් දෙදෙනෙකු ඝාතනය කිරීමේ සිද්ධියේදී මාකඳුරේ මධුෂ්ට තොරතුරු ලබාදී ඇති බවට තොරතුරු ඇති බැවින් මෙසේ ඔහු රඳවා තබාගෙන ප‍්‍රශ්න කිරීමට නියමිත බව ද පොලිස් මාධ්‍ය ප‍්‍රකාශකවරයා පැවසීය.

මෙම බන්ධනාගාර නිලධාරියා මාකඳුරේ මධුෂ්ගේ කුඩා කල සිට මිතුරකු වන අතර මධුෂ් උපදින අවස්ථාවේ ඔහුගේ මවට අවශ්‍ය සත්කාර කර ඇත්තේ පවුල් සෞඛ්‍ය සේවිකාවක වූ මෙම බන්ධනාගාර නිලධාරියාගේ මව බවද හෙළිවී ඇතැයි රුවන් ගුණසේකර මහතා ප‍්‍රකාශ කළේය.

මෙම පැමිණි අයට මෙරටට පැමිණීම සඳහා ගුවන් ටිකට් පත් ලබාදුන්නේ එරට රජය ද නැතිනම් වෙනත් කිසිවෙකු විසින් ඒවා ලබාගත්තේද යන්න ගැන පරීක්‍ෂණ පවත්වාගෙන යන බව ද හෙතෙම කියා සිටියේය.

ඩුබායි අත්අඩංගුවේ සිටින මාකඳුරේ මධුෂ් ඇතුළු සෙසු පිරිස මෙසේ පිටුවහල් කරන්නේද යන්න ගැන මෙතෙක් දැනුම් දීමක් ලැබී නැතැයි කී මාධ්‍ය ප‍්‍රකාශකවරයා ආරක්‍ෂක අංශ ඒ ගැන විමසිල්ලෙන් පසුවන බව ද කීවේය.

මෙම අත්අඩංගුවට ගත් පුද්ගලයින්ගෙන් කටුනායක ගුවන් තොටුපල රහස් පොලීස් ඒකකයේ නිලධාරීන් මෙන්ම, කොළඹ අපරාධ කොට්ඨාශයේ නිලධාරීන්, පොලිස් විශේෂ කාර්ය බලකාය, පොලිස් මත්ද්‍රව්‍ය කාර්යාංශය ආදී විශේෂිත අංශ ගණනාවක් මගින් ප‍්‍රශ්න කරනු ලැබූ බව ද පොලිස් මාධ්‍ය ප‍්‍රකාශකවරයා සඳහන් කළේය,

You May also like

Leave a Reply

Your email address will not be published. Required fields are marked *