ශ්‍රී ලංකාවේ ඇති වී ඇති තත්ත්වය මර්දනය සඳහා ජාත්‍යන්තර සහාය ඉල්ලා සිටීමට අපේක්ෂා කරන බව ජනාධිපති මෛත්‍රීපාල සිරිසේන මහතා පවසයි. ලංකාවේ සිටින සියලූ විදේශ තානාපතිවරුන් සහ මහකොමසාරිස්වරුන් කැඳවා රටේ වත්මන් තත්ත්වය පැහැදිලි කර ජාත්‍යන්තර සහාය ඉල්ලා සිටිමටද තීරණය කර ඇත.
පාස්කු ඉරිදා සිදුවූ සිදුවීම් පසුපස ජාත්‍යන්තර ත‍්‍රස්තවාදී සංවිධාන සිටින බවට බුද්ධි අංශ වාර්තාකර ඇති බැවින් ඔවුන් මර්දනය කිරීම සඳහා මෙලෙස ජාත්‍යන්තර සහාය ඉල්ලා සිටීමට නියමිතය.
මේ අතර කතෝලික දේවස්ථාන සඳහා ආරක්ෂාව අවශ්‍ය සියලූ ස්ථානවලට විධිමත් ආරක්ෂක වැඩපිළිවෙළක් සකසන්නැයි ද ජනාධිපතිවරයා ආරක්ෂක අංශවලට උපදෙස් දී තිබේ.
රට තුළ ඇතිව තිබෙන තත්ත්වය සැළකිල්ලට ගෙන මෙම ඉදිරි ක්‍රියාමාර්ග කඩිනම් කිරීමට පොලීසියට සහ ත්‍රිවිධ හමුදාවටත්, ආරක්ෂක අමාත්‍යාංශයටත් උපදෙස් දී ඇත.
