සංචාරක ශ්‍රී ලංකා කණ්ඩායම සහ දකුණු අප්‍රිකානු කණ්ඩායම අතර පැවැත්වෙන පළමු ටෙස්ට් ක්‍රිකට් තරගයේ 3 වන දිනය අදයි. සිය දෙවෙනි ඉනිම ක්‍රීඩා කළ දකුණු අප්‍රිකානු කණ්ඩායමේ සියලුම පිතිකරුවන් අද (15) දිනයේදී ලකුණු 259කට දැවී ගියා.
දකුණු අප්‍රිකානු දෙවෙනි ඉනිමේ වැඩිම ලකුණු ලාභියා වූ නායක පෆ් ඩූ ප්ලෙසිස් ලකුණු 90 ක් රැස් කළා. ක්වින්ටන් ඞී කොක් ලකුණු 55යි. පන්දු යැවීමේදී ලසිත් ඇඹුල්දෙණිය ලකුණු 66 කට කඩුළු 5 ක් දවා ගත්තා. විශ්ව ප්‍රනාන්දු ලකුණු 71 කට කඩුළු 4 යි. දකුණු අප්‍රිකානු කණ්ඩායම පළමු ඉනිමේදී රැස් කළ ලකුණු සංඛ්‍යාව 235 ක්. ශ්‍රී ලංකාව පළමු ඉනිමේදී රැස් කළේ ලකුණු 191ක් පමණයි.
ඒ අනුව ශ්‍රී ලංකා පිළට දෙවෙනි ඉනිමේදී හිමිව ඇති ඉලක්කය ලකුණු 304 ක්. ඒ අනුව දෙවෙනි ඉනිම ක්‍රීඩා කරන ශ්‍රී ලංකා කණ්ඩායම තුන්වන දවස නිමාකරන විට කඩුලු 3ක් දැවී ලකුණු 83ක් රැස් කර ගෙන සිටියා.
