ශ්‍රී ලංකාවේ වයස්ගතම පියා අවුරුදු 109ක් ආයු වළඳා යන්න ගිහින්

ශ්‍රී ලංකාවේ වයස්ගතම පියා බව කියන ඇඹිලිපිටිය පදලංගල තෝරගල ප්‍රදේශයේ පදිංචිව සිටි පරණලියනගේ දොන් පියදාස මහතා වයස අවුරුදු එකසිය නවයයි මාස හයක් ගෙවා පසුගිය 9 වැනිදා මිය ගියේය.

ඒ මහතාගේ අවසන් කටයුතු මහා පදලංගල ප්‍රදේශයේ මහ සංඝරත්නයේ හා ප්‍රදේශවාසීන්ගේ සහභාගිත්වයෙන් ඉකුත් 11 දින ඇඹිලිපිටියේදී සිදුකරනු ලැබිණි.

මියගිය පියදාස මහතාගේ උපන් දිනය 1910 ජනවාරි 13 ලෙස සඳහන්ය. වැඩිහිටි හැඳුනුම්පතක් ඇඹිලිපිටිය ප්‍රාදේශීය ලේකම් කාර්යාලයෙන් නිකුත් කර ඇති අතර ඒ අනුව ඒ මහතා මිය යනවිට වයස අවුරුදු එකසිය නවයයි මාස හයක් සම්පූර්ණ වී ඇත.

දරුවන් නව දෙනකුගේ පියකු වන පියදාස මහතා ප්‍රදේශවාසීන් විසින් හඳුන්වනු ලබන්නේ පියදාස කපු මහත්තයා යන නාමයෙනි. පියදාස කපු මහතාගේ බිරිය හා දරුවන් දෙදෙනෙකු මීට වසර ගණනාවකට පෙර මියගොස් ඇති අතර ඔහුගේ වැඩිමහලු දියණිය හැත්තෑ පස් හැවිරිදි වියෙහි පසුවන අතර බාල පුත්‍රයා පනස් දෙහැවිරිදිය.

කතරගම මහ දේවාලයේ කපු මහතා ලෙස සේවය කර ඇති පියදාස මහතා පසුව දෙවුන්දර දේවාලයේ, අම්බලන්තොට, බෝලාන, සියඹාලගස්විට, මහනුවර යන ප්‍රදේශවල පිහිටි දේවාලයන්හි කපු මහතකු වශයෙන් කටයුතු කර ඇත.

තම පියා මීට දින හයකට පමණ පෙර අසනීප තත්ත්වයකින් පෙළුණු බවත් ඒ අවස්ථාවේ වෛද්‍යවරයෙක් හා හෙදියන් කිහිප දෙනකු නිවෙසට පැමිණ ප්‍රතිකාර ලබාදුන් බවත් මියගිය පියදාස මහතාගේ බාල පුත්‍රයා වන පී.එල්.ඒ. මහින්දපාල මහතා පැවැසීය.

තම පියාට මුනුපුරු මිනිපිරියන් පනහකට ආසන්න සංඛ්‍යාවක් සිටින බවත් පියා මිය යනතෙක්ම හොඳ කල්පනා ශක්තියකින් ජීවත් වූ බවත් ජීවත්ව සිටින කාලයේ තම දරුවන් ඇතුළු සියලුදෙනාට මෙන්ම ප්‍රදේශයේ කිසිවකුගේ සිත රිදෙන ආකාරයේ වචනයක්වත් පවසා නොමැති ඒ මහතා සමාජ සේවකයෙක් ලෙස විශාල සේවාවක් සිදුකරමින් ජනාදරයට පත්ව සිටි අයෙකි.

පල්ලේබැද්ද – සිසිර පීල්ලදෙනිය