දකුණු පළාත් විශේෂ අපරාධ මෙහෙයුම් ඒකකයේ නිලධාරීන් පිරිසක් විසින් රත්ගම ප‍්‍රදේශයේ ව්‍යාපාරිකයන් දෙදෙනකු පැහැර ගෙන ගොස් පහරදී කෲර අන්දමින් ඝාතනය කර ඔවුන්ගේ සිරුරු විනාශ කර දමා ඇති බව අපරාධ පරීක්ෂණ දෙපාර්තමේන්තුව සිදු කළ විමර්ශනවලින් අනාවරණය වී තිබෙනවා.
මෙම ව්‍යාපාරිකයන් දෙදෙනාගේ සිරුරු විනාශ කර දැමූ ස්ථානය මේ වනතුරු නිශ්චිතව හඳුනාගෙන නැති අතර ඒ සම්බන්ධයෙන් ඉතාම වැදගත් තොරතුරු රාශියක් ලැබී ඇති බව ද පොලිස් ආරංචි මාර්ග පවසනවා.
මෙම ව්‍යාපාරිකයන් දෙදෙනාට එරෙහිව කිසිදු අපරාධ චෝදනාවක් නොමැති බව ද විමර්ශනවලින් හෙළි වී තිබෙනවා.
සංවිධානාත්මක පොලිස් කණ්ඩායමක් විසින් මෙම ව්‍යාපාරිකයන් දෙදෙනා පැහැර ගෙන ගොස් ඇත්තේ කප්පම් මුදල් ලබා ගැනීමට හෝ එසේ නොමැති නම් කිසියම් පුද්ගලයකු ලබාදුන් මුදල් කොන්ත‍්‍රාත්තුවක් මත වන්නට ඇතැයි අපරාධ පරීක්ෂණ දෙපාර්තමේන්තුව සැක පහළ කරනවා.
දකුණු පළාත් විශේෂ අපරාධ විමර්ශන ඒකකයේ පොලිස් පරීක්ෂක කපිල නිශාන්ත සිල්වා නමැත්තා අපරාධ පරීක්ෂණ දෙපාර්තමේන්තුව මගින් පෙරේදා (18 )අත්අඩංගුවට ගත් අතර ඔහු මේ වනවිට රිමාන්ඞ් බන්ධනාගාරගත කර සිටිනවා.
මෙම ව්‍යාපාරිකයන් දෙදෙනා පැහැර ගෙන ගිය බවට එල්ල වන චෝදනා සැකකාර පොලිස් පරීක්ෂක නිශාන්ත සිල්වා ප‍්‍රතික්ෂේප කළ බව ද පොලිසිය පවසන අතර මෙම පොලිස් කණ්ඩායම ව්‍යාපාරිකයින් දෙදෙනා පැහැර ගෙන යන ආකාරය අඩංගු සී. සී. ටී. වී. දර්ශන මෙන්ම තවත් සාක්ෂි රැසක් ද අපරාධ පරීක්ෂණ දෙපාර්තමේන්තුව මේ වනවිට සොයා ගෙන තිබෙනවා.
සැකකාර පොලිස් පරීක්ෂකවරයාට එරෙහිව මීට පෙර ද විවිධ චෝදනා එල්ල වී තිබෙන අතර ගාල්ල දිස්ති‍්‍රක්කය භාර නියෝජ්‍ය පොලිස්පතිවරයා මොහු මාතරට මාරු කර යවා ඇත්තේ ද මොහුට එල්ල වූ චෝදනා විමර්ශනයකින් පසුවය.
මේ අතර දකුණු පළාත් විශේෂ අපරාධ මෙහෙයුම් ඒකකයේ ස්ථානාධිපතිවරයා ඇතුළු තවත් නිලධාරීන් පස්දෙනකුට අද (20 ) අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දැනුම් දී තිබෙනවා.
මෙම සංවිධානාත්මක පොලිස් කණ්ඩායම ව්‍යාපාරිකයන් දෙදෙනා පැහැර ගෙන ගොස් මෙසේ ඝාතනය කර ඇත්තේ උසස් නිලධාරීන්ගේ අනුදැනුමකින් තොරව බව ද විමර්ශනවලින් හෙළි වී ඇති බවයි පැවසෙන්නේ.
ඉකුත් ජනවාරි 23 වැනිදා රත්ගම රත්න උදානගම ප‍්‍රදේශයට කේඞීඑච් වර්ගයේ වෑන් රථයකින් සහ සුදු පැහැති මෝටර් රථයකින් පැමිණි සන්නද්ධ පොලිස් නිලධාරීන් 13 දෙනකු විසින් මෙම ව්‍යාපාරිකයන් දෙදෙනා පැහැර ගෙන ගොස් තිබිණි.
පැහැර ගැනීමට ලක්වූ මංජුල අසේල කුමාර තිදරු පියෙකු වන අතර ඔහු ධනවත් මාළු ව්‍යාපාරිකයෙකි. රසිත් චින්තක එක්දරු පියෙකු වන අතර ඔහු ද කුකුළු මස් ව්‍යාපාරයේ නිරත වූ ධනවත් ව්‍යාපාරිකයෙක් වනවා.
