නාකොටික් මගඩි රැසක්ම එළියට – පසුගියදා ඇල්ලූ හෙරොයින් කිලෝ දෙසිය විසිපහ සහල් මලුවලට අසුරා ඇත්තේත් පොලිසියෙන්මයි !

මහබාගේ පොලිස් වසමේදී ඉකුත් මැයි 14 වැනිදා පොලිස් මත්ද්‍රව්‍ය නාශක කාර්යාංශය විසින් අත්අඩංගුවට ගත් බව කියූ හෙරොයින් කිලෝ දෙසිය විසිපහ සහල් මලුවලට අසුරා ඇත්තේ දැනට අත්අඩංගුවේ පසුවන පොලිස් මත්ද්‍රව්‍ය කාර්යාංශයේ නිලධාරීන්ම බවට විමර්ශනවලදී තහවුරු වී තිබෙනවා.

මෙම හෙරොයින් තොගය අත්අඩංගුවට ගත් බවට මාධ්‍ය සාකච්ඡාව පැවැත්වීමට පෙර මාතර, බලපිටිය හා කඳානේ වූ ආරක්ෂිත නිවස්න (Safe house) තුළදී කිලෝ දහයේ සහල් ගෝනි ගලවා ඒවාට හෙරොයින් කිලෝව බැගින් වූ පාර්සල් දැමුවේත් මොවුන් බවට පරීක්ෂණවලදී හෙළි වී තිබුණා.

මෙම කුඩු තොගය ​ගොඩබිමට රැගෙන ඒමට ට්‍රෝලරය කුලියට ගෙන මුහුදට ගොස් ඇත්තෙත් ඒවා සහල් මලුවල අසුරා කුලියට ගත් ලොරියකින් මහබාගේ, වැලිසරට රැගෙනවිත් ඇත්තෙත් මොවුන්මයි.

එම හෙරොයින් තොගය මාතර සිට කොළඹට රැගෙන එන අතරේ පාර්ලිමේන්තුව පසුපස පිහිටි කිඹුලාඇල ප්‍රදේශයේදී හෙරොයින් තිබූ එක් ගෝනියක් බිමට බා ඇති බවද විමර්ශනවලදී තවදුරටත් හෙළි වී තිබෙනවා.

මෙම කණ්ඩායමට මෙකී කුඩු තොගය ප්‍රවාහනය කර රුපියල් ලක්ෂ එකසිය තිහක් ලබාගෙන ඇති බවත් මීට අමතරව තවත් කුඩු කිලෝ අනූනවයක් මිනුවන්ගොඩ ටයිල් චමින්දට ගෙන ගොස් දුන් බවත් හෙළි වී ඇති බව වාර්තා වනවා.

මාකඳුරේ මධුෂ්ගේ කුඩු ජාවාරම් මෙහෙය වූ ඩුබායිහි සිටින ගිහාන් ෆොන්සේකා සමග එක් වී මෙම කුඩු කිලෝ අනූනවය විකුණා ඇතැයි ද හෙළි වනවා.

බන්ධනාගාරගතව සිටින වෙලේ සුදා විසින් ලබාදෙන කුඩු තොග මෙසේ රැගෙනවිත් බෙදාහරින මෙහෙයුමකදී මෙකී චෝදනා එල්ලවූ නිලධාරීන් සම්බන්ධ වී සිට ඇතැයි හෙළි වී තිබුණා.

මෙම මෙහෙයුම්වලට සම්බන්ධ වූ තවත් නිලධාරීන් කිහිපදෙනෙකු අත්අඩංගුවට ගැනීමට නියමිතව ඇති බවත්, ඉදිරියේදී පොලිස් මත්ද්‍රව්‍ය නාශක කාර්යාංශයේ රැසකට ස්ථාන මාරුවීම් ලබාදීමට නියමිත බවත් ඉහළ පෙළේ ආරංචි මාර්ග සඳහන් කරනවා.

You May also like

Leave a Reply

Your email address will not be published. Required fields are marked *